Ən son Xəbərlər

Mühüm hadisələr

"Su ehtiyatlarından səmərəli istifadəyə dair Dövlət Proqramı"nın layihəsi hazırdır

Ölkə ərazisində mövcud olan su çatışmazlığı və su anbarlarında yaranmış vəziyyətlə əlaqədar Prezident İlham Əliyev tərəfindən “Su ehtiyatlarından səmərəli istifadənin təmin edilməsi ilə bağlı əlavə tədbirlər haqqında” Sərəncam imzalanıb. Sənədə əsasən, 2020-2022-ci illər üçün Tədbirlər Planı təsdiq edilib və müvafiq dövlət qurumlarına tapşırıqlar verilib.

Mikrobiologiya İnstitutunun direktor v.i.e., AMEA-nın müxbir üzvü Pənah Muradov iqlim dəyişikliyi səbəbindən su ehtiyatlarının azalması və adambaşına düşən su sərfiyyatının Avropa ilə müqayisədə iki dəfə artıq olması, həmçinin əhalinin sayının artması kimi səbəblərdən dolayı su ehtiyatlarından səmərəli istifadənin zəruri olduğunu bildirib.

Daha ətraflı Elm TV-nin hazırladığı reportajdan izləyə bilərsiniz.

© www.science.gov.az

Azərbaycan Milli Elmlər Akademiyasının Rəyasət Heyətinin növbəti iclası keçirilib

Fevralın 2-də Azərbaycan Milli Elmlər Akademiyasının Rəyasət Heyətinin növbəti iclasında akademik Ramiz Mehdiyev ölkə başçısının 11 yanvar 2022-ci il tarixli Sərəncamı ilə “Azərbaycan Respublikası Prezidentinin fəxri diplomu” ilə təltif edilən akademik Məmməd Salmanova mükafatını və AMEA-nın Fəxri fərmanını təqdim edib. Görkəmli alim Məmməd Salmanovu İnstitutumuzun bütün kollektivi adından 90 illik yubileyi münasibətilə ürəkdən təbrik edir, ona möhkəm can sağlığı və elmimizin inkişafı yolunda böyük nailiyyətlər arzulayırıq.

 

 

İşğaldan azad edilmiş ərazilərin su, torpaq və bitki ehtiyatlarının müasir vəziyyəti araşdırılacaq

AMEA-nın Mikrobiologiya İnstitutunun Elmi şurasının növbəti onlayn iclası keçirilib.

İclası müəssisənin direktor v.i.e., AMEA-nın müxbir üzvü Pənah Muradov açaraq iştirakçıları gündəlikdəki məsələlərlə tanış edib. Qeyd edib ki, tədbirdə 2020-ci ilin yekunları, 2021-ci ildə görüləcək işlərin planı və cari məsələlərin müzakirəsi nəzərdə tutulub.

P.Muradov bu günlərdə AMEA-nın Biologiya və Tibb Elmləri Bölməsi ilə birgə keçirilən iclasda müəssisənin təqdim olunan hesabatı ətrafında qeyd edilən fikirlərə, iradlara toxunaraq, gələcəkdə onların əldə rəhbər tutulmasının vacibliyini bildirib. Onun sözlərinə görə, hesabat ilində pandemiyanın yaratdığı çətinliklərə baxmayaraq, institut nəzərdə tutulan bütün işləri yerinə yetirib, bəzi sahələrdə ötən illərlə müqayisədə yüksəlişə nail olunub. Diqqətə çatdırılıb ki, bu, özünü ilk növbədə dərc edilən məqalələrin həm sayında, həm də dərc olunma yerlərində büruzə verib. Belə ki, 2019-cu ildə beynəlxalq sitatgətirmə və xülasələndirmə bazalarına düşən jurnallarda dərc edilən məqalələrin sayı 5 olduğu halda, 2020-ci ildə bu rəqəm 10-a yüksəlib.

Humanitar fəaliyyət çərçivəsində müəssisənin aktiv iştirak etdiyini deyən P.Muradov Koronavirusla Mübarizəyə Dəstək Fonduna 800 manat, Silahlı Qüvvələrə Yardım Fonduna həmkarlar təşkilatı ilə birgə 5800 manat, “YAŞAT” Fonduna isə 1000 manat məbləğində vəsaitin köçürüldüyünü xatırladıb. Bundan əlavə, 5 şəhid ailəsinin hər birinə 400 manat olmaqla maddi yardım da edilib. Gələcəkdə bu istiqamətdə fəaliyyətin davam etdirilməsi, eləcə də əməkdaşların iş qabiliyyətindən pandemiyanın yaratdığı şəraitə uyğun istifadəsinin səmərəliliyinin yüksəldilməsinin məqsədəuyğunluğu vurğulanıb. 

İclasda, o cümlədən 2021-ci ildə ölkəmizin müxtəlif ərazilərindəki su, torpaq və meşə ekosistemlərinin, həmçinin qapalı mühitlərin mikro və makro-biotasının müxtəlif aspektlərdə qiymətləndirilməsinə və müxtəlif biotoplardan ayrılan mikroorqanzimlərdən praktiki məqsədlər üçün istifadəyə həsr olunan 2 problem üzrə 17 mərhələdə tədqiqatların aparılmasının nəzərdə tutulduğu bildirilib.

Yığıncaqda müəssisənin laboratoriyaları tərəfindən təqdim edilən işlər geniş müzakirə olunaraq təsdiqlənib. Eyni zamanda Azərbaycanın işğaldan azad edilmiş ərazilərində də elmi tədqiqat işlərinin aparılmasının vacibliyinə toxunulub.

Müzakirələr nəticəsində 2021-2025-ci illərdə Mikrobiologiya İnstitutunda Pənah Muradovun rəhbərliyi altında “Azərbaycanın işğaldan azad olunmuş ərazilərinin su, torpaq və bitki ehtiyatlarının müasir vəziyyətinin və səmərəli istifadəsinin mikrobioloji əsaslarının işlənib hazırlanması” adlı yeni mövzunun tematik plana əlavə edilməsi, sözügedən mövzu üzrə 1 iş və 3 mərhələ üzrə tədqiqatların aparılması, həmin işlərin 4 laboratoriyada (Su mikrobiologiyası, Torpaq mikrobiologiyası, Mikrobioloji biotexnologiya və Eksperimental mikologiya laboratoriyası) yerinə yetirilməsi qərara alınıb

© www.science.gov.az

Mikrobiologiya İnstitutu “YAŞAT” Fonduna ianə edib

AMEA-nın Mikrobiologiya İnstitutunun kollektivi və müəssisənin Həmkarlar Təşkilatı tərəfindən Azərbaycan Respublikasının ərazi bütövlüyünün müdafiəsi ilə əlaqədar yaralananların və şəhid ailələrinin təminatına dəstək məqsədilə yaradılan “YAŞAT” Fonduna 1000 manat vəsait köçürülüb

© www.science.gov.az

Mikrobiologiya İnstitutu ilə Kənd Təsərrüfatı Nazirliyi arasında əməkdaşlıq genişləndirilir

AMEA-nın Mikrobiologiya İnstitutu ilə AR Kənd Təsərrüfatı Nazirliyinin (KTN) Aqrar Elm və İnnovasiya Mərkəzi arasında onlayn formatda görüş keçirilib.

Görüşün keçirilməsində məqsəd Azərbaycanda kənd təsərrüfatının inkişafında mikrobiologiya elminin nailiyyətlərindən istifadənin bu günü, gələcək perspektivləri və əməkdaşlıq üçün mümkün sahələrin müəyyənləşdirilməsi ilə bağlı fikir mübadiləsinin aparılması olub.

Görüşdə Aqrar Elm və İnnovasiya Mərkəzinin elmi işlər üzrə direktor müavini, b.ü.f.d. Fərman Kərimov, təsərrüfat işləri üzrə direktor müavini Samir Süleymanov, KTN-nin Meyvəçilik və Çayçılıq Elmi-Tədqiqat İnstitutu, Əkinçilik Elmi-Tədqiqat İnstitutu, o cümlədən Bitki Mühafizə və Texniki Bitkilər Elmi-Tədqiqat İnstitutunun direktorları və aparıcı mütəxəssisləri iştirak ediblər.

Görüşdə Mikrobiologiya İnstitutu tərəfdən direktor v.i.e., AMEA-nın müxbir üzvü Pənah Muradov, b.e.d. Samirə Nəcəfova, b.e.d. Könül Baxşəliyeva, b.ü.f.d. Anar Hüseynov, b.ü.f.d. İradə Babayeva və b.e.d. Fəridə Qəhrəmanova çıxış edərək müəssisənin hazırda hansı sahələrdə kənd təsərrüfatının inkişaf etdirilməsi baxımından imkanlara malik olması barədə məlumat veriblər. Bildirilib ki, Mikrobiologiya İnstitutu hazırda KTN-nin Meyvəçilik və Çayçılıq Elmi-Tədqiqat İnstitutu və Tərəvəzçilik Elmi-Tədqiqat İnstitutu ilə bir sıra sahələrdə praktiki layihələr həyata keçirir və gələcəkdə bu işləri genişləndirmək mümkündür.

Sonda əməkdaşlığın genişləndirilməsi, Azərbaycanda kənd təsərrüfatının inkişafında mikrobiologiya elmindən və Mikrobiologiya İnstitutunun əldə etdiyi nəticələrdən istifadənin zəruriliyi vurğulanıb.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

Mikrobiologiya İnstitutu Koronavirusla Mübarizəyə Dəstək Fonduna vəsait

 AMEA-nın Mikrobiologiya İnstitutu Prezident İlham Əliyevin “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 2020-ci il 19 mart tarixli Fərmanına əsasən yaradılan Koronavirusla Mübarizəyə Dəstək Fonduna yardım kampaniyasına qoşulub.

İnstitutun alimləri bir aylıq əməkhaqlarının müəyyən hissəsini könüllü şəkildə fonda ianə ediblər.

Xatırladaq ki, müəssisə əməkdaşları koronavirusla mübarizə ilə bağlı maarifləndirmə tədbirlərinə qoşulur, həmçinin Nazirlər Kabineti yanında Operativ Qərargahın qərar və tövsiyələrinə ciddi riayət edirlər.

© www.science.gov.az

Mikrobiologiya İnstitutundan ordumuza dəstək

Ölkəmiz üçün çətin və eyni zamanda şanlı bir dövrdə istər Azərbaycan əsgər və zabitlərinin göstərdikləri fədakarlıq, istərsə də xalqımızın nümayiş etdirdiyi möhkəm birlik, həmrəylik və Vətənə sevgi hər bir vətəndaşlarımızda milli qürur və fəxarət hissi yaşadır.

Ordumuza dəstək olmaq məqsədilə AMEA-nın Mikrobiologiya İnstitutunun kollektivi Azərbaycan Silahlı Qüvvələrinə Yardım Fonduna 2500 manat vəsait köçürüb. Alimlər ordumuzun qələbəsinə inanır və ona dəstək verir.

İnstitutun direktor vəzifəsini icra edən AMEA-nın müxbir üzvü Pənah Muradov ordumuza dəstəyin davamlı olacağını bildirib.

Qələbə bizimlədir! Qarabağ Azərbaycandır!

© www.science.gov.az

Mikrobioloq alim İctimai TV-də koronavirusun yeni mutasiyasından danışıb

Mikrobiologiya İnstitutunun direktor v.i.e., AMEA-nın müxbir üzvü Pənah Muradov İctimai TV-nin canlı yayımlanan “Sabaha saxlamayaq” verilişinin qonağı olub. Verilişdə alim COVID-19 virusunun yeni mutasiyası, peyvəndlərlə bağlı məsələlərə aydınlıq gətirib. 

P.Muradov öz çıxışında pandemiyaya gətirib çıxaran və bu qəbildən olan viruslarda yeni mutasiyaların yaranmasının gözlənilən olduğunu bildirib, bunu RNT tərkibli virusların genomu ilə əlaqələndirib. Mikrobioloq alim bu xəstəliyin qarşısının alınmasında peyvəndlərin istifadəsinin müəyyən əhəmiyyət daşımasına da toxunub. Eyni zamanda verilişdə pandemiya ilə bağlı səslənən digər fikirlərə də münasibət bildirib.

Verilişin tam variantına buradan baxa bilərsiniz.

© www.science.gov.az

Mikrobioloq alimlərin müəllifi olduğu kitab Rusiyada çapdan çıxıb

AMEA-nın Mikrobiologiya İnstitutunun əməkdaşları - professor Nəriman İsmayılov, biologiya elmləri doktoru Samirə Nəcəfova və biologiya üzrə fəlsəfə doktoru Aygün Qasımovanın həmmüəllifi olduqları “Ekoloji, sosial və istehsal problemlərinin həlli üçün bioklaster kompleksləri” adlı kitab Rusiyada işıq üzü görüb.

Kitab insanların həyat fəaliyyətində və onların yaşayış mühitinin hərtərəfli yaxşılaşdırılmasında cəmiyyətin müasir inkişafının əsas vəzifəsi olan ekoloji-sosial-iqtisadi amillərin birliyinin qorunması yollarına həsr edilib.

Nəşrdə Azərbaycanın ətraf mühitinin vəziyyətinin ümumi qiymətləndirilməsi aparılıb və ərazinin gələcək inkişaf planları nəzərdən keçirilib. Ətraf mühitin kompleks şəkildə qorunması üçün biotexnologiyaların istifadəsinin perspektivləri göstərilib. Bu nöqteyi-nəzərdən Azərbaycanın ekoloji-sosial-iqtisadi problemlərinin həlli üçün inteqrasiya olunmuş istehsal təsərrüfatları sistemlərinin - bioklasterlərin elmi əsasları işlənib hazırlanıb. Qapalı biotexnoloji tsikilli bioklasterlərdə elə regional resursların səmərəli istifadəsi nəzərdə tutulur ki, fokuslanmış son nəticə yüksək praktiki əhəmiyyətə malik olsun. İşlənib hazırlanmış bütün biotexnologiyaların əsasını mikrobioloji, biokimyəvi və texnoloji proseslər təşkil edir.

Vəsait ətraf mühitin mühafizəsi, ekoloji texnologiyaların tətbiqi sahəsi üzrə təhsil alan tələbələr, o cümlədən də ixtisaslaşmış mütəxəssislər üçün nəzərdə tutulub.

Qeyd edək ki, kitabın rəyçisi akademik Məhərrəm Babayevdir.

© www.science.gov.az